Mae gan glybiau chwaraeon ran allweddol i’w chwarae mewn darparu cyfleoedd chwaraeon ar gyfer pobl ieuainc ac mae gan bobl ieuainc ran allweddol i’w chwarae mewn sicrhau llwyddiant a datblygiad clybiau chwaraeon yn y dyfodol                        

Gyda’r rhan fwyaf o gampau, mae’n allweddol i lwyddiant y clwb eu bod yn denu ac yn annog chwaraewyr ieuainc.  Fodd bynnag, mae pob clwb yn unigryw ac efallai nad yw pob clwb yn teimlo bod adran iau yn briodol iddynt.  Wrth gyflwyno chwaraewyr ieuainc i’ch clwb, mae’n rhaid i chi ystyried y cyfrifoldeb o ddarparu ar gyfer a gofalu am bobl ieuainc a sut fydd pobl ieuainc yn effeithio ar aelodau eraill yn y clwb.                           

Mae creu cysylltiadau ysgol-clwb cryf yn allweddol wrth ddatblygu clwb.  Fodd bynnag, un maes a esgeulusir neu a anghofir yn aml mewn clwb yw datblygu cysylltiadau gyda’r gymuned ehangach.  Dylai clybiau geisio creu cysylltiadau gyda’r grwpiau hyn oherwydd gallant fod yn ffynhonnell o aelodau neu wirfoddolwyr newydd.

Mae datblygu partneriaethau rhwng ysgolion a sefydliadau chwaraeon i ddarparu cyfleoedd o safon i bobl ieuainc wneud cynnydd yn eu camp o ysgol i glwb yn bwysig.  Bydd hyn yn galluogi i blant symud o ysgol i amgylchedd oedolion yn rhwydd.  Bydd newid i amgylchedd safonol, atyniadol a chynyddol o gymorth iddynt symud ymlaen yn eu dewis gamp.  Gellir addasu’r newid hwn i ddiwallu anghenion ysgolion a sefydliadau chwaraeon.                             

Yr ysgolion lleol ddylai fod yn bwynt cyswllt cyntaf i’r clwb.  Dylai clwb allu cyflwyno achos cryf dros ddatblygu cysylltiadau gyda’r ysgol leol oherwydd mae sawl mantais i’r ysgol a’r clwb.  Yn ystod y blynyddoedd diwethaf, mae chwaraeon ysgol wedi dioddef oherwydd y pwysau a roddir arnynt gan y cwricwlwm sy’n newid o hyd, y rhwystrau ariannol a’r amser a gyfyngir.  Os bydd llai o oriau ar gael a mwy o gyfyngiadau ar amser y staff, dylai clwb chwaraeon lleol blaenllaw gamu i’r adwy i ddarparu cyfleoedd chwaraeon o safon i bobl ieuainc.                                

Drwy ffurfio cyswllt gyda’r ysgolion lleol, gall y clwb a’r ysgol gydweithio i ategu rhaglen chwaraeon yr ysgol a llenwi’r bylchau, drwy helpu gyda darparu’r cyfleoedd chwaraeon ychwanegol hyn.