Un rhan hanfodol o unrhyw glwb yw darparu amgylchedd diogel a chyfeillgar i bawb.

Wrth i fwy a mwy o bobl ieuainc, hyfforddwyr, swyddogion a gwirfoddolwyr ddod yn aelodau a chyfranogwyr mewn clwb, mae mwy o alw ar amser pobl – a mwy o angen am fod yn ymwybodol o faterion lles.

Mae’n ddyletswydd ar glwb i ystyried sut mae’n cynnal ei weithgareddau a chymryd camau rhesymol i sicrhau bod cyfranogwyr, ymwelwyr a gwirfoddolwyr yn gallu mwynhau’r gamp / gweithgaredd a ddarperir gan y clwb mewn amgylchedd diogel.  Mae hyn yn arbennig o wir wrth ystyried pobl ieuainc a grwpiau bregus.

Mae’n hanfodol bod clwb yn sefydlu gweithdrefnau priodol er mwyn gwarchod plant ac aelodau bregus, a hefyd i warchod yr hyfforddwyr a’r gwirfoddolwyr.  Mae’n rhaid i’r clwb sicrhau bod y polisïau a’r gweithdrefnau sydd yn eu lle yn benodol i’r math o gamp / gweithgaredd ac i’r clwb.

Mae gan lawer o Gyrff Rheoli Cenedlaethol (CRhC) eu canllawiau eu hunain ar gyfer Lles mewn clybiau, ac os oes canllawiau o’r fath yn bodoli, dylid cadw atynt.  Fel cam cyntaf, cysylltwch â’ch CRhC i weld pa ddogfennau polisi a gweithdrefnau sydd ganddo.

Mae’r Uned Amddiffyn Plant mewn Chwaraeon (CPSU) yn leoliad addas arall ar gyfer derbyn gwybodaeth.  Mae’r uned hon wedi’i sefydlu ledled y DG gan bartneriaethau rhwng y cynghorau chwaraeon (e.e. Cyngor Chwaraeon Cymru) a’r NSPCC.  Mae gan yr Uned Amddiffyn Plant mewn Chwaraeon ei gwefan ei hun, ac adnoddau ac achlysuron hyfforddi i chi eu defnyddio i sicrhau bod popeth yn ei le yn eich clwb.